Кыргыз жана Өзбек өкмөт башчыларынын жолугушуусунда бир катар документтерге кол коюлду

Бүгүн, 16-августта эки өлкөнүн өкмөттөр аралык отурумунда премьер-министр Сооронбай Жээнбеков Кыргыз менен Өзбекстандын соода-экономикалык кызматташуусу мындан ары да жакшыра турганын билдирди.

Сооронбай Жээнбеков Өзбекстандын премьер-министри Абдулла Арипов биринчи жолу Кыргыз мамлекетине келгенин, бүгүн тарыхый күн болгонун баса белгиледи.

Отурумда өкмөттөр аралык 8-отурумдун протоколуна жана чек араларды делимитациялоо жана демаркациялоо боюнча протоколго кол коюлду.

Кыргыз өкмөт башчысы Өзбек тарап менен соода-экономикадан тышкары маданий-гуманитардык, билим берүү, дене тарбия жактан кызматташуу улана турганын кошумчалады. Ошондой эле президент Алмазбек Атамбаев жакын арада Өзбекстанга расмий иш сапары менен бара турганын билдирди.

Ал эми өзбек өкмөт башчысы Абдулла Арипов бүгүнкү отурумдагы сүйлөшүү Өзбекстан тарапты канааттандырганын айтты. Кыргыз мамлекети менен бардык тармак боюнча кызматташууга даяр экенин белгилеп өттү.