Америкада токойдон адашып кеткен кыз 28 күндөн кийин аман табылды

АКШнын Луисвилл шаарынын 25 жаштагы Лиза Терис аттуу жашоочусу жоголгондон 1 айдан кийин чытырман токойдон аман табылды. Бул тууралуу чет элдик маалымат булактары жазууда.

Маалыматка ылайык, Лиза ушул жылдын июль айында адашып кетип 28 күндөн кийин табылган.

"Жанында эч бир буюму жок Теристи куткаруучулар табышкан. Ал бул убакыт аралыгында токойдогу жашылча, козу карындар менен курсагын тойгузуп, булактан суу ичип жүргөн. Адашкан студент кыз бир айдын ичинде 23 килограммга арыктап, денесин чиркей, курттар чагып, таш-даракка урунган жерлери көгөрүп, шишип, тилинип кеткен", - деп жазылат маалыматта.

28 күн карындашын издеп, түйшөлгөн Лизанын агасы Уилл өзүнүн Фейсбуктагы баракчасына: "28 күн бою жапайы жаныбарлар жашаган чытырман токойдон карындашым аман табылды, ал тирүү. Менин өмүрүмдөгү эң күчтүү адам", - деп жазган.

Лизанын эжеси: "Ал абдан арыктап, азып, алсыз болуп калган. Азыр денесинин бардык жери ооруп жатат. Денесинде тытылбаган, курт-кумурска чакпаган таза жери калбаптыр", - деген.

Жергиликтүү полицияга Лизанын айтып берүүсү боюнча, ал токойго 2 эркек киши менен барган. Алар токойдогу мергенчилердин үйүн тонойбуз деп жатканда кыз кылмышка каршы чыгып, аларга кошула албай тургандыгын билдирип, качып кеткен. Ал аймак студент кызга такыр тааныш эмес болгондуктан бак-дарактуу чытырман токойдон чыга албай калган.

Полиция Лизанын аман калганына таң калып жатканын жашырган эмес, алар мындай окуяны акыркы 15 жылдан бери кезиктире элек экенин айтышкан.