Оор дартка кабылган 27 жаштагы шаар тургуну: "Учурда азык-түлүк, тамак-аштан кыйналып жатабыз. Жардам берчүлөр болсо жакшы болмок"

Буга чейин рак илдетине кабылып, 5 жолу операция жасаткан Дилбар Асанакун кызы кайрадан оор абалда. Бул тууралуу ал бүгүн, 17-августта SUPER.KG порталына буларды айтты:

"Оор дартка кабылгандыктан буга чейин мага 5 ирет операция жасалды. Операцияга, дарыга кеткен чыгымдарды Араб өлкөлөрүнүн бириндеги кайрымдуулук фонд каржылап жатты. Алар бир жылдан бери жашап жаткан үйүмдүн да ижара акысын төлөп жатышат. Былтыр дарыгерлер мени стресс болуп, оор абалга түшүп калбасын деп рактын эң акыркы коркунучтуу даражасын алып жүргөнүмдү айтышкан эмес экен. Акыркы 4-5 айдан бери башымдагы шишик өсүп, аны дарыгерлер операция жолу менен алып салууну сунушташты. Бирок буга чейин ичегинин рак илдетине кабылып, 9 жолу химиялык жол менен дарылангам. Ошондуктан "кийинки башыӊа жасалчу эки операцияны көтөрө албай калышың мүмкүн, кепилдик бере албайбыз" дешти дарыгерлер. Башымдагы шишик улам өсүп жатыптыр", - дейт Асанакун кызы.

Белгилей кетсек, каарманыбыз Тоң районунун Дөң-Талаа айылында өскөн, азыр 27 жашта. Буга чейин эки ирет турмуштан жолу болбой бири каза болуп калса, экинчи жолдошу таштап кеткен.

"Ушул күнгө чейин арабдардын карамагында жашап элдин колун карап калдым. Эл арасынан да жардам берип жүргөндөр болду. Баарына ыраазымын. Колумда эки кичине балдарым бар. Алардын улуусу 2-класста окуйт, кенже балам 2,5 жашка толду. Бир убакта массалык маалыматтардан абалымды окугандар келип жардам беримиш болуп "Өлөрүңдү билип калсаң мага чал, мен балдарыңды багып алайын" дегендер болду. Андан бери 1 жылга жакын убакыт өттү. Балдарымды эч кимге бергим келбейт. Акыркы убактарда азык-түлүк, тамак-аштан кыйналып жатабыз. Эч жактан киреше жок. Жардам берчүлөр болсо жакшы болмок", - деп кошумчалады Дилбар Асанакун кызы.