Конор Макгрегор буту менен Флойд Мейвезерди тепсе, гонорарынын 90 пайызынан ажырашы мүмкүн

Мыкты делген эки мушкердин кийинки жумада боло турган беттешин алардын күйөрмандары чыдамсыздык менен күтүшүүдө. Флойд Мейвезер журналисттерге Конор Макгрегор бокстун эрежелери тыюу салган соккуларды колдонсо, 90 пайыз гонорарынан ажырашы мүмкүн экенин айткан.

"Макгрегор мени бут менен тээп жиберсе эмне болот? Чоң айып алат. Ал гонорарынын 90 пайызынан ажырап калат", - дейт Мейвезер.

Эскерте кетсек, Конор Макгрегор буга чейин бокс боюнча бир дагы беттеш өткөргөн эмес. Ал UFC уюмунда эки салмак категориясында чемпион аталган. UFC'нин эрежеси боюнча бут, чыканак жана тизе менен урууга болот. Макгрегор эрежесиз урушта 24 беттеш өткөрүп 21 жолу жеңишке жетип, үчөөндө жеңилүү ызасын тарткан.

Ал эми Флойд Мейвезер 2015-жылы спорттук карьерасын токтоткон. Ал жалпы 49 беттеш өткөрүп баарында жеңишке жетишүү менен рекорд койгон. Мейвезер бокс боюнча 5 салмак категориясында чемпиондукту камсыздаган.

Эске салсак, эки чемпиондун беттеши Лас-Вегас шаарында 26-августта орун алат. Беттештин уюштуруучулары алдын-ала эсептөөлөр боюнча 600 миллион доллардай киреше түшөрү айтылууда.