БШК Текебаев үчүн чогултулган 38 миң кол тамганын баарын жараксыз деп табуу чечимин кабыл алды

Бүгүн, 17-августта Борбордук шайлоо комиссиясы Өмүрбек Текебаевдин президенттикке талапкер кылып каттоо үчүн топтолгон 38 миңден ашуун кол тамгаларды жараксыз деп тапты.

БШКнын мүчөсү Абдыжапар Бекматов билдиргендей, жумушчу топтун чечими менен бул чогултулган колдор анык эмес деп табылган. Бул чечимди БШКнын 9 мүчөсү колдоп, бирөөсү каршы болду. "Мыйзамга ылайык, кол топтоодогу чыгымдардын бардыгы шайлоо фондунан жүргүзүлүшү керек болчу. Бул боюнча чечимди кечээ кабыл алышыбыз керек эле. Атайын талапкердин ыйгарым укуктуу өкүлдөрү тарабынан маселеге түшүнүк киргизсин деп эскертүү бергенбиз. 7-августтан бүгүнкү күнгө чейин БШКнын жумушчу тобу талапкердин штабына кат жазган, жооп беришкен эмес. Суралган документтер, келишимдер көрсөтүлүп берилбеген үчүн ушундай чечим кабыл алынды. Мыйзамда каралгандай, чогултулган кол тамгаларды 10 күн аралыгында карап чыгуу керек", - деди Бекматов.

Айта кетсек, Өмүрбек Текебаевдин тарапташтары аны талапкер кылып каттоо үчүн 38 миң 642 жарандын колун топтоп тапшырган. Мыйзамга ылайык, талапкер 30 миңден ашуун кол топтоо шартын аткарышы керек.