СУПЕРСТАН: "Досум мени телефонуна "Барам сага" деп жазып коюптур, мен да аны "Чанач келатат" деп сактап койдум"

SUPER.KG порталынын "Суперстан" бөлүмүндө "Уюлдук телефондогу өзгөчө көңүл бурарлык, кызыктуу аталыштар жазылат" деген тема талкууга алынып келет. Анда колдонуучулар уюлдук телефонунда сакталган ар кандай кызыктуу, күлкүлүү ысымдар менен бөлүшүп турушат.

Темадагы билдирүүлөрдөн:

"Кээде мен да укмуш сөздөрдү жазып алам. Бирок инимдики андан да кызыктуу. Ал машина айдаганды 8-класста эле үйрөнүп, машинасын жанындай жакшы көрөт. Андан улам сүйлөшкөн кызы менен көп чырдашат. Иним "шустрый" болгондуктан, кызынын жанында башкалар менен деле таанышып коё берет. Бир жолу ал сыртка чыгып кетип, телефону чырылдап калды, карасам "Фара" деп турат. Көрсө, сүйлөшкөн кызынан жашырып, таанышкан кыздардын аттарын жазбай, машинанын тетиктерин жазып коёт экен. "Кийин кантип атын таап аласың" десем, "мисалы, "Фаранын" көздөрү балбылдап турат дейт. Кийин "Бампер" деген кыз чалды, аны өзүмчө элестетип, күлүп койдум".

"Бир окуя эске түшүп кетти. Үйдө иш кылып жатсам апам телефонду көтөрүп келип "ме, мамалагың чалып жатат" дебеспи. Кулакка күлкүлүү угулат экен. А мен "Мамалак" деп сүйлөшкөн кызымды (азыр келинчегим) сактап койгон болчумун. Ал "Мамалак" азыр "Күчүгүмө" айланып калган".

"Досум мени "Барам сага" деп жазып коюптур, анан мен да аны "Чанач келатат" деп сактап койдум".

"Мына кызык, бүгүн бир досум менен отургам, телефонун алып музыка өткөрүп жаткам. Анан телефонго чакыруу келди, карасам "Администратор" деп турат. "Ии, досум, кайсы кафеге ишке кире калдың" десем, "ай, бул менин апам деп жатпайбы".

Талкууга кошулгуңуз келсе, бул жакка кириңиз.