Абдумалик Шерматовдун камкордугундагы эки көзү көрбөгөн аял ырчы камалгандан бери балдары менен ачка отурганын айтты

Кечээ, 18-августта ырчы Абдумалик Шерматовдун камакка алынганы белгилүү болгон. Ушул эле күнү анын үстүнөн арыз жазгандар окуянын чоо-жайын айтып беришкен. SUPER.KG порталы өз учурунда ырчы Абдумалик Шерматовдун тарабын да окуя боюнча угууга даярдыгын билдирген эле. Андыктан Абдумалик Шерматовдун жарандык камкордугундагы аялмын деген Айнагүл Абасова менен байланышып, бул окуялар боюнча пикирин уктук.

"Ал эч кимден акча алган эмес. Мунун баары курулай доомат. Бул иштердин баарын анын мурдагы аялы уюштуруп жатат. Менин эки көзүм көрбөйт, жалган сүйлөбөйм. Абдумалик көзүмдүн көрбөгөнүнө карабай, эки балам менен өзүнүн камкордугуна алды. Мурда Шамалды-Сай шаарчасында бир кампада жашачумун. Ал мени сахнага алып чыгып, жашоонун кандай экенин көрсөттү. Күйөөм ичип, чегип, мени ур-токмокко алчу. Кийин Абдумалик менен сахнага чыгып ырдап, күйөөм менен жашабай калгандан кийин ырчы менин макулдугумду сурап, балдарым менен өзүнүн камкордугуна алды. Эки күндөн бери ал камалып кеткенден кийин эки балам менен ачка отурабыз. Ал болгондо концерт коюп, бизди ачка калтырмак эмес”, - деди Абасова.

Ал эми Абдумалык Шерматовдун жактоочусу ырчынын камалышы боюнча маалымат берүүдөн баш тартты. “Азыр тергөө иштери жүрүп жатат. Материалдар менен тергөөчү аркылуу байланышып таанышсаңар болот. Мындай иш ар бир адамдын башына келип калышы мүмкүн. Тергөөдө баары иликтенет”, - деди жактоочу.

Эске сала кетсек, ырчы Абдумалик Шерматов алдамчылыкка шектелип 15-августтан 16сына караган түнү Чүй облусунун аймагынан кармалып, 2-сентябрга чейин эки жумага камакка алынган.