СУПЕРСТАН: "Өкүл ата, өкүл эне тууралуу эмнелерди билесиз?"

SUPER.KG порталынын "Суперстан" бөлүмүндө "Өкүл ата - өз ата аман болсун кайната, өкүл эне - өз эне, эсен болсун кайнене" дегенге сиз кандай карайсыз?" деген тема талкууга алынган.

Темадагы билдирүүлөрдөн:

"Ата-энемдин өкүл уулдары көп. Биз менен жакшы катташат. Райондон айылга көчүп келгенде алгачкылардан болуп үйгө келишип, айылдын адатынча тамак даярдап, келип кош келипсиздер деп кетишкени эсимде. Мен ал кездери кичине болгондугумдан маани бербептирмин. Кийинчерээк үч жыл мурун аяш атамдын уулу үйлөнүп, атам менен апам аларга өкүл болушту. Ал акем менен мурун жакшы катышта болгондугумдан бир тууган байкелүү болгондой аябай кубангам. Үйдүн жанына өтүп бара жатса сөзсүз кирип, ал-акыбал сурап кетет эле, апам да сүйүнүп калчу. Чындыгында өкүл ата, апалар аябай жакын адам болуп калат экен. Улуу агаларым өкүл ата коюуга аябай маани беришиң керек деп көп айтышат. Учурда өкүл аталарды материалдык жактан жакшы адамдарды тандоо модага айланып кетпедиби. Бул туура эмес көрүнүш. Өкүл ата коюу менин оюмча бул эң жакшы салттардын бири. Себеби катташпай бара жаткан алыс тууган, тааныштарды бир туугандай байланыштырып коёт экен. Ошондуктан ойлонуп, кийин өкүнбөй турган болуп караштырып коюу керек".

"Үйлөнгөндөн кийин кыз тараптан күйөөгө, күйөө тараптан келинге өкүл ата, өкүл эне дайындалат. Өкүл ата, өкүл эненин зарылдыгы төмөнкүдөн улам келип чыккан: үйлөнгөн жигит да, жаңы келген келин да көпкө чейин ата-энелеринен тартынып жүрүшөт. Ошентип турмуштун жайын биле элек жаш жубайлар акыл-насаат, тарбиядан оолак калышы ыктымал. Ошол себептен келинге да, күйөө балага да тарбия берип, көзөмөлдөп жүрүш үчүн өкүл ата, өкүл эне дайындалат. Өкүл ата менен өкүл эне жубайларга экинчи ата-эне болушат. Булардын айткан акылын өкүл балдар угууга милдеттүү".

"Өкүл ата, өкүл эне дегенди кичинемден эле угуп жүрөм. Жаңы үй-бүлөгө жакшы үлгү болчу үй-бүлөдөн өкүл тандап коюлат. Алар жаш үй-бүлө никелешкен күндөн баштап ар кандай жакшылык, жамандыктарына күбө болуп, кеп-кеңештерин берип келишет. "7 үй-бүлөгө өкүл ата, өкүл эне болгон адамдар бейишке бир тепкич жакындайт" деп да уккам. Менин бир өкүл эжемдин төркүнү алыскы облустан болгондуктан менин ата-энемди өзүнүн төркүнүндөй көрөт, бардык жакшылык, жамандыктарына өзүнүн төркүндөрү келе албагандыктан алардын милдетин өкүл ата, өкүл энеси аткарат. Менин оюмча өкүл ата, өкүл эне коюу жаш үй-бүлө үчүн керектүү деп ойлойм. Азыр кээ бир жерлерде экиден да коюп калышты".

Талкууга кошулгуңуз келсе, бул жакка кириңиз.