"Оорукчан баланын кереги жок" деп атасы таштап кеткен 8 жаштагы Актан балдак менен баса баштады

Бир жылдан бери балдактын жардамы менен баса баштаган Актан Абдылдаев быйыл 8 жашка толду. Аны атасы төрөлгөндө "жарым жан, оорукчан баланын кереги жок" деп таштап кеткенин апасы Мээрим Эсеналиева бүгүн, 22-августта SUPER.KG порталына айтып берди.

"Уулум 6,5 айлык болуп төрөлдү. Дарыгерлер балама 1,5 жашында тубаса майып (ДЦП синдрому коштолгон) деген диагноз коюшту. Ошол учурда жолдошум "мындай баланын кереги жок" деп бизди таштап кетти. Кийинчерээк баламды ар кандай жол менен дарылап, массаж жасатып жүрдүк. 7 жашка чыкканча жөрмөлөп жүрдү. Бир жылдан бери балдак менен басып жатат. Мунусуна өзү да, биз да сүйүнүп жатабыз. Дагы массаж жасата берсек жылыш болот деген үмүт бар. Бир жолку массажга 300-350 сом жумшалат. Кээде ошол каражат да табылбай калат", - дейт Эсеналиева.

Мээрим Эсеналиева Ат-Башы районунун тургуну. Ал экинчи жолу турмушка чыгып, жолдошу менен Бишкектин Калыс-Ордо конушунда батирде жашайт. Быйыл Актанды мектепке берүүгө даярданууда. Ал үчүн алгач баласынын документтерин даярдап, андан соӊ окуу куралдарын, мектеп формасын сатып берүүнү көздөөдө.

"Актанга көз айнек сатып беришибиз керек. Ал тамга таанып калган, санаганды да билет. Мектепке алып барсак үйдөн эле окуткула дегендер чыкты. Бирок ал күндө үйдө камалып отурбай балдарга аралашсын деп мектепте окуталы деп жатабыз. Балабыздын акылы жетик. Өз алдынча окуп, үйрөнүүгө аракет кыла берет. Эми ага атайын балдак сатып берүү, көз айнек сатып алуу жана массаж кылууга каражат керек. Жардам берчүлөр болсо, баш тартпайбыз", - деп кошумчалады Эсеналиева.