Экотехинспекция: "Таласта чек арачыларга салынган турак жайга сапатсыз кыштар пайдаланылгандыктан курулуш кайра бузулду"

Талас шаарында чек ара кызматкерлери үчүн салынып жаткан көп кабаттуу турак жай сапатсыз кыш менен курулган. Бул тууралуу бүгүн, 23-августта Экологиялык жана техникалык коопсуздук боюнча инспекциясынын маалымат кызматынан билдиришти.

Маалыматка ылайык, пайдаланылган кыштардын арасында жараксыз сапаттагы кирпичтер болгондуктан курулуш буздурулуп, сапаттуу курулуш каражаттарын пайдалануу талабы коюлган. Атайын лабораториядан өткөргөндө пайдаланылган кирпичтин сапатсыздыгы аныкталган.

"Мыйзамсыз иштер токтотулуп, акты, протоколдор толтурулду. Ал эми куруучу ишкананын өкүлдөрүнө административдик айып салынган. Аталган курулуштун жүрүшүн инспекторлор толугу менен көзөмөлгө алууда", - деп билдирди басма сөз кызматы.

Экологиялык жана техникалык коопсуздук боюнча инспекциясы куруучулардын баарын сапатсыз курулуш каражаттарын колдонбоого чакырып, мындай учурда кооптуу абал жаралышын эскертти.