"Сентябрь" телеканалы канча күндүн ичинде жабылышы керек экени белгилүү болду

Бишкектеги Биринчи Май райондук сотунун "Сентябрь" телеканалынын ишине тыюу салуу боюнча чечими күчүнө кирди. Бул тууралуу бүгүн, 23-августта SUPER.KG порталына аталган соттон билдиришти.

Маалым болгондой, бул чечим боюнча апелляциялык даттанууга 3 күн берилет. "Учурда телеканал иштеп жатат. Эгер 3 күндүн ичинде даттануу берилбесе, телеканал жабылышы керек", - дешти соттон.

Ал эми "Сентябрь" телеканалынан билдиришкендей, алар шаардык сотко райондук соттун чечими боюнча даттануу менен сөзсүз түрдө кайрылышат.

Айта кетсек, кечээ, 22-августта Бишкек шаарынын Биринчи Май райондук соту "Сентябрь" телеканалынын ишине тыюу салуу боюнча чечим чыгарган. Башкы прокуратуранын өкүлүнүн айтымында, 2016-жылы 29-сентябрда Жалал-Абадда "Сентябрь" телеканалынын түз эфиринде Абдылда Капаров аттуу жаран (Ош облустук ички иштер башкармалыгынын мурдагы башчысы - ред.) 2010-жылдагы Ош окуясы тууралуу маек берип жатып, улуттар аралык кастыкты козутууга багытталган пикирин айткан. Буга байланыштуу Башкы прокуратура телеканалды жабуу суранычы менен сотко кайрылган.