Текебаевдин адвокаты сотко эскертүү бергени үчүн жактоочулук лицензиясынан ажыратылышы мүмкүн

"Ата Мекен" партиясынын лидери Өмүрбек Текебаевдин жактоочусу Канат Хасанов жактоочулук лицензиясынан ажыратылышы мүмкүн. Бул тууралуу Хасанов өзү SUPER.KG порталына билдирди.

Анын айтымында, буга анын Өмүрбек Текебаевдин сотунда жумуш убактысы бүткөнүнө карабай уланганына карата эскертүү бергени негиз болууда.

"Сот Айбек Эрнис уулу мен соттук отурумду иш убактысы бүткөндүгүн жана Өмүрбек Текебаевге "Тез жардам" кызматы чакырылып, абалы начарлаганына байланыштуу эртеңки күнгө жылдырыңыз деп 2-3 жолу эскерткенимди негиз кылып менин үстүмөн жеке аныктамасын берип жатат. Жеке аныктама берилгенден кийин ал Юстиция министрлигине жиберилет. Анын негизинде адвокатуранын этика боюнча комитети карап өзүнүн жыйынтыгын чыгарып берет. Эгер чындап менин аракеттерим туура эмес деген чечим чыгарышса, ал Юстиция министрлигине жөнөтүлөт да анын негизинде менин адвокаттык лицензиям жокко чыгарылат. Мен бул жеке аныктаманын үстүнөн даттануу жазам. Андан сырткары мен дагы бүгүн мыйзамдын негизинде Кыргыз Республикасынын Адвокатурасына кайрылдым, алар карап чыгып өздөрүнүн чечимин чыгарышат", - деп түшүндүрдү жактоочу.

Андан сырткары ал аталган соттун жеке аныктамасынын негизинде анын лицензиясынан ажыратуу аракетин саясий куугунтук катары баалай турганын кошумчалады.