Башкы прокуратура “Сентябрь” телеканалынын үстүнөн жазган доо арызы боюнча түшүндүрмө берди

Башкы прокуратура “Сентябрь” телеканалынын жабылышы боюнча маалымат таратып, телеканалдын өкүлдөрү коомго туура эмес маалыматтарды таратып жаткандыгын айтты.

Прокуратуранын түшүндүрмөсүндө санарип форматта борбордон чыгып жаткан “Сентябрь” каналы мурда Жалал-Абаддан чыгуучу аналогдук “Сентябрдын” лицензиясы менен иштеп жаткандыгы айтылат. "Маалыматтык технологиялар жана байланыш боюнча мамлекеттик комитеттен, Юстиция министрлигинен алынган расмий документтер муну далилдей турганы көрсөтүлгөн", - деп айтылат түшүндүрмөдө.

Эске сала кетсек, 22-августта Биринчи Май райондук соту “Сентябрь” телеканалына карата прокуратуранын доо арызын канааттандырып, аталган каналдын ишмердүүлүгүнө тыюу салган. Буга 2016-жылдын 29-сентябрында, Ош ОИИБинин мурдагы башчысы Абдылда Капаровдун түз эфирдеги сүйлөгөн сөзү негиз болгон.