Абылгазиев: "Боинг кырсыгындагы зыяндын ордун толтуруу маселеси жакында чечилет"

Курулуш башкармалыгынын дачалары айылындагы авиакырсыктан мамлекетке келтирилген зыяндын ордун толтуруу маселеси жакында чечилет.

Бул тууралуу 24-августта премьер-министрдин милдетин аткаруучу Мухаммедкалый Абылгазиев билдирди. Өкмөттө бүгүн Боинг кырсыгында келтирилген материалдык чыгымды Түркия тарапка төлөтүү маселеси талкууланган кеӊешме өтүп, ага тийиштүү мамлекеттик органдардын башчылары катышканын өкмөттүн маалымат кызматы кабарлады.

Абылгазиев мындай дейт: "Мекемелер аралык жумушчу топ жана өкмөттүк комиссия жабыркагандарга жардамдашуу боюнча көп иш жасады. Көпчүлүк жабыркагандардын үйлөрү талкаланып документтери жоголуп кеткен. Аларга туулгандыгы тууралуу күбөлүктөр, паспорттор, билим алгандыгы жөнүндө аттестаттар, нике күбөлүктөрү берилди. Түркия тарап менен сүйлөшүү жүргүзүүгө зарыл болгон документтерди берүүнү артка тарткан башка көйгөйлөр да болду. Ага карабай мамлекеттик органдар ыкчам иш жүргүзүштү. Тезинен медициналык жана психологиялык жардам көрсөтүлдү. "ACT Airlines" компаниясы менен сүйлөшүүлөрдөн кийин кырсыктан каза тапкандардын жакындары - 34 адам Анталия шаарында эс алып келишти".

Түркия тарап менен сүйлөшүүлөр аяктаса, өкмөттүк комиссия иш жыйынтыгы боюнча коомчулукка кеӊири маалымат берери айтылды.

Эскерте кетсек, 39 адамдын өмүрүн алган авиакырсык 2017-жылдын 16-январында болгон.