Президенттикке эки талапкер эмне себептен шайлоого катышуудан баш тартканын айтышты

Президенттикке эки талапкер Марат Иманкулов жана Сагынбек Абдрахманов президенттик жарышка катышуудан баш тартышты. Бул тууралуу алар бүгүн, 24-августта маалымат жыйынында билдиришти.

Иманкулов шайлоого катышуудан баш тартуусун өлкөдөгү саясий кырдаалга байлады. “Мен бул шайлоого катышпайм, бирок саясий ишмердүүлүгүмдү мындан ары улантам. Биздин бийлик эч качан өткөндөн сабак алган жок. Мен бул шайлоонун таза, адилеттүү өтүшүнө ишенбейм. Бул шайлоо эмес, жөн гана саясий шоу болот. Мен өзүмдүн командама, өзүмдүн тарапташтарыма ыраазычылык билдирем”, - деди Иманкулов.

Абдрахманов шайлоодо утарына ишенбегенин айтты. “Кол топтоо учурунда 38 миң кол топтогон болчумун, бирок мен аны БШКга тапшырбайм. Мен миллион сом күрөөдөн качкан жокмун. Мен бул шайлоодон утарыма ишенбейм. Анткени кол топтоо учурунда көрдүк, азыркы систем Кыргыз жеринде миллионерлер, байлар үчүн гана түзүлүп калыптыр”, - деди Абдрахманов.