Бекназаров анын Ташиев менен сүйлөшүүсү делген аудиожазуу боюнча түшүндүрмө берди

Бүгүн, 24-августта маалымат жыйынында саясатчы Азимбек Бекназаров анын Камчыбек Ташиев менен сүйлөшүүлөрү делген интернетке тараган аудиожазуу монтаж экенин айтты.

“Акыркы 10 күндө Текебаевдин сотунан кийин аудио, видеожазуулар пайда болду. Мага бир канча сын пикирлер айтылды. Мен жооп бериш үчүн келдим. Ташиев менен Бекназаровдун сүйлөшүүсү делген аудио - бул монтаж. Мен Ташиев менен отуруп жекеме жеке сүйлөшө элекмин. Акыркы жолу аны менен Текебаевдин сотунда жолуккам. Отуруп сүйлөшкөнгө мүмкүнчүлүк боло элек", - деди Бекназаров.

Мындан тышкары ал Текебаевдин сотунда калп айтпаганын, 10 жылдан кийин да ушул көрсөтмөсүн айта аларын айтты.

Эскерте кетсек, 13-август күнү интернетке Азимбек Бекназаров менен Камчыбек Ташиевдин үнүнө окшош адамдардын Өмүрбек Текебаевдин сотундагы көрсөтмөлөрү тууралуу чай үстүндө сүйлөшүүсү жазылган аудио тараган.