Көк бөрү: Кыргыз курама командасы финалга жолдомо алды

Казакстандын Астана шаарында өтүп жаткан көк бөрү боюнча Дүйнө чемпиондугунда Кыргыз курама командасы тайпалык баскычтын 1 туру калганда финалга жолдомо алды. Бул тууралуу Көк бөрү федерациясынан SUPER.KG`ге билдиришти.

"Алдыда дагы америкалыктар менен оюн бар. Команда финалга чыкты деп эсептесек болот", - деп айтылат маалыматта.

Бүгүн, 24-августта Улуттук курама 4-турдун алкагында тажик оюнчулары менен кез келип, 15:2 эсебинде жеңип алды. Бул жеңиш менен кыргыздар мелдештин жүрүшүндө 4 беттеште жеңишке жетип, 12 упай топтогон соң мөөнөтүнөн мурда финалга ойногонго мүмкүнчүлүк алды.

Эми 27-августта өтө турган финалдык беттеште Кыргыз курама командасы "В" тайпасынын жеңүүчүсү менен ойнойт.

Эртең, 25-августта Кыргыз курама командасына АКШ курамасы туш келет.

Эске салсак, Кыргыз улакчылар мелдештин алгачкы күнү Монголия курамасын 4:0 эсебинде, Өзбек курамасын 11:2 эсебинде, Түркия курамасын 13:3 эсебинде жана тажик оюнчуларын 15:2 эсебинде жеңип алды.