Бишкек ШИИББи: "Шектүү буюм көрсөңөр дароо милицияга кабарлагыла"

Өлкөдө 31-августта Кыргыз Республикасынын Эгемендүүлүк күнү, 1-сентябрда Курман айт майрамы белгиленет. Буга байланыштуу Бишкек шаардык ички иштер башкы башкармалыгы борбор шаарда 29-августтан тарта күчөтүлгөн тартипте иштеп баштаарын кабарлады. Бишкектеги коомдук коопсуздукту 2200 укук коргоо кызматкери көзөмөлдөй турганы айтылды.

Коопсуздук чаралары күчөтүлгөнүнө байланыштуу Бишкектин борбордук көчөлөрүндө автоунаа кыймылына чектөө киргизилет. Чүй проспектиси Тоголок Молдо көчөсүнөн Тыныстанов көчөсүнө чейин, Тоголок Молдо, Логвиненко көчөлөрү жана Эркиндик бульвары Чүй проспектисинен Киев көчөсүнө чейин жабылат.

"Шектүү, ээси жок буюм тапкан учурда (көчөдөн, унаадан, коомдук жайлардан) аларды кармоого, ачып көрүүгө же ордунан жылдырууга кескин тыюу салынат. Тезинен 102 номери аркылуу милицияга маалымдоо керек", - деп билдирет Бишкек ШИИББи.