Талас ОИИБи: "Жайлоодо малчы аялынын өлүмүнө шектелип кармалды. Ал мурда ойношун да сабап өлтүргөн"

Талас районунун Талды-Булак жайлоосунда мал кайтарган жаран мас абалында аялын сабап өлтүрдү. Бул тууралуу 26-августта SUPER.KG порталына Талас ОИИБинин маалымат катчысы Динара Сарногоева билдирди.

"Окуя 22-августта саат 23:00 чамасында Талды-Булак айылына жакын жайлоодогу мал сарайлардын биринде катталган. Күйөөсү ошол күнү мас абалында үйүнө келип, аялын себепсиз эле чачынан сүйрөп ур-тепкиге алган. Аял соккудан улам ошол жерден жан берген. Факт боюнча Жалал-Абад облусуна караштуу Токтогул районунда 1979-жылы туулган К.Б аттуу жаран кармалды. Иликтөө иштеринин натыйжасында ал буга чейин да кылмыш жоопкерчилигине тартылып, жаза мөөнөтүн өтөп чыккандыгы белгилүү болду. Тагыраагы 2006-жылы Токтогул районунда өз аялы менен жашап жатып, көңүлдөш аялын сабап, ал жаракатынан каза болгон экен. Бул боюнча Кылмыш-жаза кодексинин 104-беренеси (ден соолукка атайылап оор залал келтирүү) менен 4 жылга эркинен ажыратылган. Кийин 3-аялы менен турмуш куруп, аны менен 2 балалуу болушкан. Талас районунда өткөн жылдын август айынан бери бир үй-бүлөнүн малын карап жалданып иштеп жүргөн", - деди Сарногоева.