Мушкер Флойд Мейвезер Конор Макгрегорду техникалык нокаут менен жеңип алды

Бүгүн, 27-августта Лас-Вегас шаарында бокс чемпиону менен UFC уюмунун чемпиону ортосундагы беттеш бир нече мүнөттөн кийин орун алат.

10:00. Эки спортчу беттешке чыкканга даярданып жатышат.

10:04. Эки мушкер рингге чыгып баштады. Биринчи Конор Макгрегор чыгып жатат.

10:10. Макгрегордун артынан Флойд Мейвезер чыкты.

1-раунд. Эки мушкер бири-бирин аңдуу, изилдөө менен өткөрдү. Макгрегор аралыктан сокку узатса, Мейвезер коргонууда өткөрдү. Бирок кези келгенде контрчабуул коюп жатты.

2-раунд. Мейвезер дымагын күчөтүп баштады. Көбүрөөк соккуларды жасап атаандашына коркунуч жаратууда. Конор бир-эки жолу Флойддун артына өтүп эрежесиз уруштун ыкмаларын колдонууга аракет кылды.

3-раунд. Конор Макгрегор бокс рингине көнө түштү. Бирок анын кыймылдары аны профессионалдык мушкер эмес экенин билдирүүдө.

4-раунд. Флойд Мейвезер эки жолу таамай соккусу менен эсте калды. Макгрегорго калыс уламдан улам бул эрежесиз уруш эмес бокс экенин эскертүүдө.

5-раунд. Эки мушкер клинчке уламдан улам түшүүдө. Бул эки мушкердин чарчап баштагандыгы же бири-биринен коркуп жатканын билдирет.

6-раунд. Чабуулга чабуул, соккуга сокку. Беттештин чыныгы кызыгы эми башталды. Күйөрмандардын сүрөөнү менен эки спортчу мыкты раунд өткөрүштү.

7-раунд. Флойд Макгрегордун коргонуусун сезбей баштады. Анын бир канча соккулары таамай болду.

8-раунд. Америкалык мушкер чабуулун токтоткон жок. Конор артка качуудан башка эч нерсе кыла албай жатат.

9-раунд. Рингде ким чыныгы боксчу экенин Мейвезер далилдөөдө. Конор 12 раундга чыдайбы же нокаутка учурайбы башкы суроо болууда.

10-раунд. Мейвезер дагы бир канча жолу таамай сокку узатып Макгрегорду нокаутка түшүрүүгө аз калды. Бирок ортого калыс түшүп беттешти токтотту. Техникалык нокаут! Мейвезердин жеңиши.

Муну менен Мейвезер 50-беттешин жеңип, айтылуу Рокки Марчианонун рекордун ашып түштү. Беттештен соң "бул менин акыркы беттешим" деп жар салды. "Макгрегор мен ойлогондон жакшыраак беттешти".

"Мен соккулардан эмес, чарчагандан улам далбастап калдым, калыс беттешти эрте эле бүтүрүп койду", - деп айтты Конор Макгрегор.