Көк бөрү: Кыргыз улакчылары Казакстанга 4:1 эсебинде утулду

Казакстандын Астана шаарындагы "Казанат" ат майданында өтүп жаткан Көк бөрү боюнча дүйнө чемпионатында Кыргыз өлкөсү менен Казакстандын курама командаларынын финалдык беттешүүсү башталды.

Оюндун 4-мүнөтүндө Казакстандын көк бөрүчүсү Темирхан Айтпаев эсепти ачты.

7-мүнөт: казакстандык Бактыбай Шеримкулов эсепти 2:0 кылды.

10-мүнөттө казакстандын дагы бир оюнчусу Абылайхан Нышанбек 3:0гө жеткирди.

19-мүнөткө жеткенде гана Кыргыз балбаны Рустам Тыналиев өз командасынын эсебин ачты.

20-мүнөттө беттештин биринчи бөлүгү аяктап, оюнчулар 10 мүнөттүк тыныгууга чыгышты.

Экинчи бөлүктүн башталышында Александр Пупенко Казакстандын 4-упайын алып берди.

Кийинки бөлүмдө Кыргыз командасы өз эсебине упай алууга аракет жасаганы менен натыйжа чыккан жок.

Ошентип 2-бөлүк да аяктап, Көк бөрү боюнча дүйнө чемпиондугу 4:1 эсеби менен Казакстандын командасына буйруду.

Кошумчалай кетсек,"А" тайпасында Кыргыз өлкөсү буга чейин Монголияны 4:0, Өзбекстанды 11:2, Түркияны 13:3, Тажикстанды 15:2, АКШны 11:6 эсебинде утуп алган.

Казакстан "В" тайпасында ойноп Афганистанды 9:2, Россияны 15:3, Кытайды 15:4 эсеби менен жеңген. Оюндун экинчи күнүндө Азербайжан келбей калгандыктан автоматтык түрдө жеңүүчү аталган.

Бир жумага созулган көк бөрү оюндары боюнча байгелүү орунду алган өлкөлөр:

1-орун Казакстан,

2-орун Кыргыз өлкөсү,

3-орунда Тажикстан,

4-орунда Кытай.