Айсулуу Тыныбекова күрөш боюнча Дүйнө чемпиондугунан Бишкекке кайтып келди

Айсулуу Тыныбекова Парижде өткөн күрөш боюнча Дүйнө чемпиондуктан Бишкек шаарына кечээ, 27-августта учуп келди. Бул тууралуу Жаштар иштери, дене тарбия жана спорт агенттиги маалымдайт.

Айсулуу Тыныбекова 58 килограммга чейинки салмак ченинде коло медаль үчүн кытайлык Нингнинг Ронг менен беттешкен. Анда беттештин жыйынтыгында Кыргыз балбан 6:5 эсеби менен жеңишке жетип, коло медалын тагынган.

"Тилекке каршы, мен машыгуу учурунда алган жаракаттан улам мелдешке толугу менен даярданганга жетишкен жокмун. Машыгуунун ордуна мен дарыланганга мажбур болдум. Бирок ага карабай медалды камсыздаганга бардык күчүмдү жумшадым", - дейт Айсулуу Тыныбекова.

Аталган чемпиондукта Кыргыз балбаны алгачкы беттеште германиялык Лаура Мертенсди жеңген, чейрек финалда нигериялык Аминат Олувафунмилайону жеңип жарым финалга өткөн. Анда тунистик Марва Амри менен күрөшүп жеңилип калган. Коло медаль үчүн кытайлык спортчу менен күрөшүп жеңишке жеткен.