Футбол боюнча улуттук курама өзбек оюнчуларына 5:0 эсеби менен жеңилди

25-август күнү футбол боюнча Кыргыз улуттук курама командасы жолдоштук беттеште Өзбекстан курамасына 5:0 эсебинде жеңилип калды.

Өзбекстандын Ташкент шаарында өткөн беттештин алгачкы таймын Кыргыз курамасынын атаандаштары 2:0 эсеби менен жыйынтыктады. 2-таймда алмашууга чыккан Сардор Мирзаев 84-мүнөттө эсепти 3:0 кылды. Оюндун кошумча мүнөттөрүндө Жалолиддин Машарипов эсепти 4:0 кылса, Александр Гейнрих пенальтиден гол киргизип эсепти 5:0 кылды.

Беттештин жыйынтыгында улуттук курама команданын машыктыруучусу Александр Крестинин оюн пайдалуу өткөнүн жана көп маалымат алганын айтты. "Азыр ар бир футболчу жөнүндө жыйынтык чыгарса болот. Мьянма менен боло турган беттеште ким даярданары бизге белгилүү болду. Бизге кирген голдор жалпы команданын эмес, жеке футболчулардын катасы алып келди. Оюнга толук канааттандык, эсеп менен эмес, айрым учурлар менен. Өлкөнүн чемпиондугунун деңгээли башка, эл аралык деңгээл башка. Футболчулар оюн убактысын алышты, эми жыйынтыктарды чыгарабыз", - дейт Крестинин.

Эске салсак, буга чейин аталган оюндун жыйынтыгы ФИФА тарабынан катталып, командалардын рейтингине таасир этпегени маалым болгон. Ошондой эле улуттук курамдын катарында жалаң Топ Лигада ойногон футболчулар гана барган.