Facebook`тун негиздөөчүсү Марк Цукерберг экинчи ирет ата болду. Эми ал декреттик эс алууга чыгат

Facebook социалдык тармагынын негиздөөчүсү Марк Цукерберг кыздуу болду. Бул тууралуу ал өзүнүн расмий баракчасына Бишкек убактысы боюнча бүгүн таңкы саат 5те жазып, ымыркайга Август деген ысым ыйгарганын билдирди. Ошондой эле ал жубайы экөө жаңы төрөлгөн кызына арнап кат жазышкан.

"Сүйүктүү Август, жарык дүйнөгө кош келдиң! Мен жана апаң сенин келечекте ким болоруңду чыдамсыздык менен күтөбүз", - деп жазылган катта.

Бул окуяга байланыштуу Цукерберг декреттик эс алууга чыгат. Алгач 1 айга, ал эми экинчи ирет декабрда 1 айга эс алуу алат. Аталган компаниянын кызматкерлери бала төрөлгөнүнө байланыштуу 4 айлык мөөнөткө чейин эс алууга чыга алышат.

Марк Цукерберг 2012-жылы сүйүктүүсү Присцилла Чан менен баш кошуп, 2015-жылы Макс деген кыздуу болгон.