Токон Мамытов Атамбаев менен Мирзийоев Бишкекте кайсы маселелерди талкуулай турганын божомолдоду

Өзбекстандын президенти Шавкат Мирзийоев менен Кыргыз өлкөсүнүн башчысы Алмазбек Атамбаев коопсуздук, чек ара, соода-экономикалык кызматташуу маселелерин талкуулашы мүмкүн. Мындай оюн бүгүн, 29-августта “Пикир” Кыргыз аймактык эксперттер клубунун тегерек столунда Кыргызстан элдеринин ассамблеясынын төрагасы Токон Мамытов билдирди.

Анын пикири боюнча, экстремизм жана терроризм менен күрөшүү үчүн эки өлкө биргеликте иш алып баруусу керек. "Мамлекет башчылар Астана шаарындагы Шанхай кызматташтык уюмунун саммитинин алкагында жолугушканда эки тараптуу кызматташуунун деңгээлин көтөрүү боюнча сүйлөшүшкөн. Андан кийин кыргыз-өзбек өкмөттөр аралык отуруму өтүп, чек ара маселеси талкууланган. Ушул маселелер президенттердин жолугушуусунда талкууланышы күтүлүүдө", - деди Мамытов.

Эске салсак, кечээ, 28-августта Алмазбек Атамбаев Ош облусуна болгон иш сапарынын алкагында жергиликтүү тургандар менен жолугушуусунда өзбек президенти кийинки жумада Кыргыз мамлекетине келе турганын айткан.