Нуржан Шайлдабекова: "БШК Текебаевди талапкер кылып каттайбы же каттабайбы билбейм"

"Борбордук шайлоо комиссиясы "Ата Мекендин" лидери Өмүрбек Текебаев боюнча кандай чечим кабыл ала турганын билбейм", - деди бүгүн, 29-августта БШКнын төрайымы Нуржан Шайлдабекова.

Анын айтымында, эгер сот БШКнын "Текебаев үчүн чогултулган колдор жараксыз" деген чечимин мыйзамсыз деп тапса, БШК соттун бул чечимин эске алышы керек. "Борбордук шайлоо комиссия - бул коллегиалдык орган болгондуктан ал Текебаевди каттайбы же каттабайбы билбейм", - деди Шайлдабекова.

Эскерте кетсек, 17-августта Борбордук шайлоо комиссиясы Өмүрбек Текебаевдин президенттикке талапкер кылып каттоо үчүн топтолгон 38 миңден ашуун кол тамгаларды жараксыз деп тапкан. Кийин 22-август күнү Бишкек шаарынын райондор аралык сотунда Текебаевдин юристтеринин бул чечимди жокко чыгаруу арызы каралган. Сот Азиз Эшалиев ал арызды карап, БШКнын чечимин жокко чыгаруу боюнча Текебаевдин жактоочуларынын өтүнүчүн четке каккан.