Таласта сот экотехинспекциянын райондук билим берүү бөлүмүнүн башчысына салган айыбын мыйзамсыз деп тапты

Талас облусунун райондор аралык соту Экологиялык жана техникалык коопсуздук боюнча инспекциянын райондук билим берүү бөлүмүнүн башчысына салган айыбын мыйзамсыз деп тапты. Бул тууралуу бүгүн, 30-августта SUPER.KG порталына Бакай-Ата райондук билим берүү бөлүмүнүн башчысы Марат Дооронбеков билдирди.

"Экологиялык жана техникалык коопсуздук боюнча инспекция буга чейин айып салган эле. Ага макул болбой сотко кайрылгам. Бир нече жолу соттук отурум болуп Талас облусунун райондор аралык соту Экотехинспекциянын салган айыбын мыйзамсыз деп тапты. Эми мен соттун чечими менен салынган айыпты төлөбөймүн", - деп билдирди Дооронбеков.

Маалым болгондой, буга чейин Талас облустук Экологиялык жана техникалык коопсуздук боюнча мамлекеттик инспекция кызматкерлери Бакай-Ата райондук билим берүү бөлүмүнүн башчысына "мыйзамсыз иштерге барып жатат” деген кине менен 7500 сом айып салган, ага макул болбогон билим берүү бөлүмүнүн башчысы сотко арыз менен кайрылган.