Актёр Аскат Сулайманов: "Жашоодо дагы аялзатына жакынмын, бирок кинодогудай эмес"

Бир нече мүнөттөрдөн кийин белгилүү актёр, "Дем" театрынын мүчөсү Аскат Сулаймановдун SUPER.KG порталынын түз эфириндеги маеги башталат. Мүмкүнчүлүктөн пайдаланып, ырчыга сизди кызыктырган суроолорду берип, жооп алсаңыз болот.

Жөнөтүлгөн суроолордун арасынан оригиналдуу, кызыктуу делген собол ээсине белек ыйгарылат. Эскерте кетсек, жиберилген суроолор редакция тарабынан иргелет. Мааниси окшош, кайталанма суроолор эфирге чыгарылбайт. Суроолоруңузга түз эфир жүрүп жаткан учурда "Соңку кабар" аркылуу комментарий жазып же +996 557 75 63 63 WhatsApp номерине билдирүү жөнөтүп жооп алсаңыздар болот.

15:00. Аскат Сулаймановдун SUPER.KG`нин түз эфириндеги маеги башталды. Ал жай мезгилин кантип өткөргөндүгү тууралуу айтып берип жатат.

15:05. Актёр алпаруучулардын "ойготуучу" суроолоруна жооп берип жатат. Окуучу кезинде геометрия, география, химия сабактарын начар окугандыгын айтты.

15:15. "Уул, кыздарым актёрлук чөйрөгө аралашпайбыз дешет" дейт актёр. Ал 11-классынан баштап мурутун өстүрө баштаганын, ушул убакытка чейин бир гана жолу маркум актёрдун образын жаратуу үчүн аны алып салганын айтты.

15:22. Суроо: Экинчи никеңизден балалуу болдуңузбу?

Жооп: "Кудай буюрса, 10 күндүн ичинде сүйүнчүлөйбүз".

15:25. "Үй-бүлөнү сактап калуу үчүн кээде актёрлук чеберчиликти колдонууга туура келет", - дейт актёр.

15:31. "Европадагы өлкөлөргө көп бардым. Бирок эч бири биздин мекенге жетпейт. Кыргыз өлкөсүнүн абасы, чаңдаган жолу өзгөчө. Башка өлкөгө барганда бат эле өлкөнү сагынып, ал жактан тажап кетем", - деди Аскат Сулайманов.

15:36. Суроо: Кинодо кайсы жанрда ойногон жагат? Жашоодо дагы кинодогудай аялзатына жакынсызбы?

Жооп: "Мага трагедия жанрындагы кинолорго тартылган жагат. Жашоодо дагы аялзатына жакынмын, бирок кинодогудай эмес. Досторум, "подружкаларым" көп. Чынын айтыш керек, анча-мынча эркекке караганда аялзаты өтө бекем болот. Алар менен сырдашам. Аялзатына көӊүлүм жакын эмес, акылым, ички дүйнөм жакын".

"Колдон келишинче ажырашпаш керек. Ажырашканга жараша кайра мурунку адамга барбаш керек. Көп балалуу болгон жагат. Жакында алтынчы баламды күтүп жатабыз. Уулбу же кызбы, аны айтпай турайын. Кыргызды 7 миллион кылганга аракет кылам", - деди актёр.

15:45. "Биринчи жубайымдан 5 балама айлыгымдан 5 миң сом бөлүнүп турат. Балдарымды бөлүп-жармай жок. Быйыл Ысык-Көлгө алып барып эс алдырып келдим", - деди ал.

15:56. Аскат Сулайманов күйөрманынын үнүнө карата айткан комплиментине мындай дейт:

"2007-жылы кырсыкка кабылып, 6 ай сүйлөй албай калгам. Чынында үнүм мындай эмес болчу. Кырсыктан кийин өзүмө келгенде ушундай үн чыккан. Ошондон бери үнүмдү бийик созуп ырдай албайм. Буга да Кудайга шүгүр", - деди .

16:02. Суроо: Атаңыз үчүн кандай уул боло алдыңыз?

Жооп: "Атамдан артык уул болдум деп президент дагы айта албайт. Атасы болбосо каяктан президент болмок эле. Кичинекей кезимде атасыз чоңоюп калдым. Бирок атам менен 2012-жылдан бери катышып келем. Атама тең уул дагы, кем уул дагы болушум мүмкүн".

16:07. "Экинчи жубайымдын жаккан жери - мен кеч келемби, эрте келемби, мени дайыма күлүп-жайнап тосуп алат. Мүнөзү жумшак, мени менен айтышпайт", - деди ал.

16:19. Аскат Сулаймановдун SUPER.KG`нин түз эфириндеги маеги аяктады.