Бишкекте Тууганбай Абдиевдин 80 жылдыгына карата кыргыз-казак акындарынын айтышы өтүүдө

Бүгүн, 30-августта Бишкектеги Токтогул Сатылганов атындагы Улуттук филармонияда төкмө акын Тууганбай Абдиевдин 80 жылдыгына карата кыргыз-казак акындарынын айтышы өтүүдө.

Иш-чаранын башында маркум Тууганбай Абдиевдин басып өткөн жолу, сахнадагы таржымалы жөнүндө атайын тасма көрсөтүлдү. Ошондой эле "Эл ырчысы Эстебес" тобу "Махабат дастаны" фильминдеги акын катышкан эпизоддорду аткарышты. Акын Аалы Туткучев Абдиев жөнүндө, анын акындык жолу туурасында төгүп ырдады.

Айтышка кыргыз акындарынан 8, казактардан 8 төкмө акын катышууда.

Белгилей кетсек, Тууганбай Абдиев Токтогул районунда 1937-жылы төрөлгөн. Ал 10 жашында комуз үйрөнүп өнөр артынан түшкөн. Кийинчерээк Жеңижок, Коргоол, Бекназар акындын ырларынан таасирленип чоңойгон. Ал төкмөлүк, дастан айтуу өнөрүн ондогон өлкөлөргө даңазалап келген. Акын 2008-жылы дүйнө салган.