Кыргыз боз үйү Германиядагы этнологиялык музейге коюлду (фото)

Өлкөбүздүн эгемендүүлүгүнүн 26 жылдыгына карата кыргыз боз үйү Германиянын Гамбург шаарында жайгашкан этнологиялык музейге тапшырылды. Бул тууралуу бүгүн, 1-сентябрда аталган шаардагы кыргыздардын бири Айзада Акбекова SUPER.KG порталына билдирди.

"Кечээ, 31-августта колунан көөрү төгүлгөн уз Турду Кыдырбаеванын беш канат, жүз баш кыргыз боз үйүн Гамбург этнологиялык музейине белекке берүү аземи өткөрүлдү. Иш-чара "Манас" айтуу, ыр, бий, комуз чертүү менен коштолду. 1980-жылдардын башында бул боз үйдүн кээ бир элементтери "Ак илбирстин тукуму" тасмасында Мундузбай байдын үйүнүн жасалгасына колдонулуп, "Манас" эпосунун миң жылдыгында дагы байгелүү орунга илинген экен", - деди.

Айзада Акбекова боз үйдү музейге тапшыруу үчүн 4 жылдай убакыт кеткенин кошумчалады. Ошондой эле музейде 50-100 жыл мурун тапшырылган ирандык түркмөндөрдүн, моңголдордун жана казактардын боз үйлөрү бар экенин, музейдин жетекчилери көркөмдүгү жагынан кыргыз боз үйү биринчи орунда турарын айтышканын билдирди.