Москва шаарында Айт намазга 200 миңдей мусулман катышты

Бүгүн, 1-сентябрда Курман айт майрамында Орусиянын борбору Москва шаарында да Айт намазы окулду. Ага 200 миңдей мусулман катышканын Интерфакс маалымат агенттиги жазды.

Аталган маалымат булагына ИИМдин басма сөз катчылыгы: "Баш калаанын полиция кызматы жана Орусиянын аскердик гвардиясында кызмат өтөп жаткан аскерлер шаардын коопсуздугун көзөмөлдөп турушту. Баш аламандык же болбосо, тартип бузуулар катталган жок", - деп билдирген.

Саат 11ге чейин борбордун айрым көчөлөрү жабылып, намаздын катышуучуларына шарттар түзүлдү.

Ал эми Орусиянын ири шаарларынын бири Санкт-Петербургда 100 миңден ашык мусулман Курман айт намазына катышкан.

Белгилей кетсек, Орусияда эмгектенип жүргөн Кыргыз мигранттардын расмий саны учурда 600 миңдей. Ал эми расмий эмес сан мындан да көп.