Казакстанда 10 жаштагы окуучу кичинекей кызды педофилден куткарып калды

Казакстанда 10 жаштагы окуучу кичинекей кызды педофилден куткарып калган. Чет элдик маалымат каражаттары билдиргендей, мындан 5 күн мурун Акжол Сансызбай аттуу окуучу үйүнө бара жатып курулуш иштери жүрүп жаткан жерден кыздын ыйлаганын угуп калган. Акжол өзү тааныган кичинекей кызды анын ыйлаганына карабай белгисиз адам мажбурлап ээрчитип бара жатканын көргөн.

"Бул көрүнүшкө күбө болгон соң мен акырын алардын артынан аңдый баштадым. Аябай корктум, бирок кичинекей кызды тиги киши менен калтырып кете албайт болчумун. Артынан ээрчип бешинчи кабатка чыктым. Кыз аябай ыйлап, тиги киши болсо аны үнүн басуусун талап кылып жатты. Мен бардык нерсени уюлдук телефонума тартып алдым. Ал кызды моюнунан кармап муунтуп баштаганда, мен биринчи кабатка түшүп ошол жакта иштеп жаткан улуу кишилерди чакырдым. Алар келгенде тиги киши коркуп, кызды таштап качып кетти", - деген окуучу.

Акжол жабыр тарткан кызды үйүнө ээрчитип келген соң гана милиция кызматкерлери чакырылган. Окуучунун эрдигинин натыйжасынан улам шектүү алыска узаган эмес. Милиция кызматкерлери аны 15 мүнөттүн ичинде изи сууй электе колго түшүрүшкөн.