Элмира Кайып кызынын мугалими: "Буулуккан булбулум ай, жаткан жериң жайлуу болсун"

Кыргыздын булбул үндүү ырчысы Элмира Кайып кызын акыркы сапарга узатуу зыйнатына маданият өкүлдөрү, анын талантын баалагандар чогулушту.

Ырчынын мектептеги мугалими Мурат Жетимишбаев: "Жараткандын ырайымсыз мыйзамы ишке ашып эки күн мурун Элмира Кайып кызы каза болду деген кабар жан дүйнөбүздү эзип чыкты. Кабыргабыз кайышып бүгүн Баткен, Ысык-Көлдөн бери келип кайгы тартып, ушул жерде отурабыз. Арманыбыз аттын башындай. Буулуккан булбулубуздун үнүн мындан ары уга албайбыз. Көл ак куусуз калды. Жети-Өгүз дагы бир талантынан ажырап, жетимсиреп турат. Ак-Теректе мындан ары Элмиранын шаңдуу күлкүсү угулбайт. Мындан ары көлдү жээктеп басып, мурункудай суктана албайт. Биздин чоң арманыбыз ушул. Биздин каниет кыла турганыбыз казак менен түрк эли барктап, баалап, сыйлыгын берип, сыймыгын берип кыргыздын кызы деп, кыргыздын желеги менен кошо желбиретип барктап-баалап келди. Арманыбыз ушул 20 жыл сахнада тынбай жүрсө да, өзүбүз көрө алган жокпуз ошону. Кечээ эле жарлык чыкты. Кечээ эле селкинчек ойноп жүргөн кыздар күркүрөгөн чоң сыйлыктарды алып жатат. Ич күйдүүлүк эмес, өкүнүчүбүз ушул, кыргыз эли барктай албады. Класстагы 10 баладан артык, эркек мүнөз, шайдоот кызыбыз эле. Тирүүсүндө барктай албагандан кийин көз жумганда айтканыбыз куру сөздүр. Буулуккан булбулум ай, жаткан жериң жайлуу болсун! Ысык-Көл эли сени менен сыймыктанып жүргөн, дагы да сыймыктана берет. Кош бол, кызым", - деп узатуу сапарына келгендерди жашытты.

Ошондой эле коомдук ишмерлерден Кубанычбек Исабеков, мурунку министр Алтынбек Максүтов, Султан Раев да сөз сүйлөп жаш акын Бердибек Жамгырчиев Кайып кызына арнаган ырын окуп берди.

Куудул Күмөндөр Абылов: "Элмиранын дүйнөдөн кайтканы абдан көп кишинин кабыргасын кайыштырып турат. Ал кыргыз элине аттын кашкасындай таанылып, булбул үнү менен кызмат кылды. Арийне Өкмөт тарабынан сыйлыктарга ээ болбогону менен анын үнү, ачык-айрымдыгы, адамгерчилиги, таланты элдин жүрөгүндө калды".

Ырчы Мерген Турган: "Эстрададагы эбегейсиз чоң бийиктиктеги ырчы эле. Кыргыз эли чоң жоготууга учурап жатат. Жаш кетти. Айла жок экен. Жакшы эне, дос, аял эле. Баарыбыз азыр кадырына ыйлап жатабыз. Бир да мамлекеттик сыйлык албай кетти. Айтарым Элмира талантты сүйгөндөрдүн, элдин эсинде калат. Анын диапазонундай үн жок эле", - деди.

Ошентип кыргыз элинин жүрөгүндө "Булбулум" ыры менен эсте калган ырчы 42 жаш курагында 2-сентябрда, Бишкектин түштүк-батыш тарабындагы Чоң-Арык көрүстөнүнө жерге берилди. Артында жолдошу жана 1 кызы калды.

Ырчынын алган наамдары, сыйлыктары:

2012-жылы Астана шаарында Түрк элдеринин маданияты боюнча иш-чарага катышкандыгы үчүн "Turksoy" уюмунан "Алкыш" алган.

2016-жылы 30-августта "Жети-Өгүз районунун ардактуу атуулу" наамы.

2016-жылы 19-октябрда Чек ара кызматынан II даражадагы "Мыкты чек арачы" төш белгиси.

2017-жылы Жети-Өгүздө өткөн Жапар Чабалдаевдин 85 жылдыгына арналган эл аралык конкурста баш байгени алган.

Айта кетсек, Ырчы Элмира Кайып кызы 1975-жылы 4-январь күнү Ысык-Көл облусуна караштуу Жети-Өгүз районундагы Ак-Терек айылында туулган. Т.Сатылганов атындагы эстрадалык студияны жана Б.Бейшеналиева атындагы искусство институтун аяктаган.

Алгач Р.Абдыкадыровдун "Ак куулар сени сагынар" деген ыры менен К.Орозов атындагы оркестрдин коштоосунда сахнага чыккан. Эстрадада Шамшыбек Өтөбаевдин "Калды эсимде" деген ыры менен таанылган. Элмира Кайып кызынын аткаруусундагы "Булбулум" аттуу чыгарма элге кеңири тараган. Ырчы акыркы мезгилдерде Мамлекеттик чек ара кызматынын ыр жана бий ансамблинин насаатчысы болуп иштеп келген.