Өзбек президентинин Кыргыз өлкөсүнө болгон иш сапарынын алкагында эки тараптуу бир нече документтерге кол коюлат

Өзбек президенти Шавкат Мирзийоев Кыргыз өлкөсүнө мамлекеттик иш сапары менен келгенде бир канча документтерге кол коюлат. Бул тууралуу бүгүн, 4-сентябрда журналисттерге президенттик аппараттын тышкы иштер бөлүмүнүн башчысы Айзада Субакожоева билдирди.

Анын айтымында, Мирзийоев 5-6-сентябрда келет.

“Алгач Мирзийоев тар чөйрөдө президент Алмазбек Атамбаев менен жолугат. Андан соң кыргыз жана өзбек делегацияларынын жолугушуусу өткөрүлөт. Эки тараптуу кызматташуу боюнча документтерге кол коюлат. Биргелешкен билдирүүгө, кыргыз-өзбек мамлекеттик чек арасы тууралуу келишимге, илим жана билим боюнча кызматташуу документтерине кол коюлат. Бул боюнча Жогорку Кеңештин тиешелүү үч комитети дагы карап чыгышты. Өзбек президентинин премьер-министр Сапар Исаков, Жогорку Кеңештин төрагасы Чыныбай Турсунбеков менен жолугушуусу күтүлүүдө”, - деди ал.

Субакожоева чек араларды делимитациялоо иши кайсы мөөнөттө бүтөрү тууралуу азырынча айта албай турганын кошумчалады.