Астанада массалык мушташка катышкан индиялыктар өлкөдөн депортацияланат

Казакстандын Астана шаарында курулуш иштери жүрүп жаткан "Абу-Даби Плаза" соода борборунда болгон массалык мушташка катышкан индиялык жумушчулар Казакстандан чыгарылат.

Казакстандын Ички иштер министрлиги билдиргендей, массалык мушташ боюнча кылмыш иши козголгон, тергөө учурунда күнөөлүүлөр аныкталып, соттун чечими менен 30дан ашуун Индия жараны өлкөдөн депортациялана турганын маалымдады.

"Азыркы учурда териштирүү иштери жүрүп жатат. Күнөөлүүлөрдүн дээрлик бардыгы аныкталды. Азыркы учурда алар көрсөтмө берип жатышат. Массалык мушташка катышкан 30 Индия жараны өлкөсүнө депортацияланат. Ал эми күзөтчүнү сабаган индустарга жана аларды сабаган күзөтчүлөргө кылмыш иши козголду", - деп айтылат маалыматта.

Эске сала кетсек, 2-сентябрда Астана шаарында курулуш иштери жүрүп жаткан "Абу-Даби Плаза" соода борборунда Индия жарандары менен Казак жарандарынын ортосунда массалык мушташ орун алган. Казак полициясынын айтымында, жаңжал мас абалында жумушка келген индиялык куруучуну күзөтчү курулуш аймагына киргизбей койгондон улам келип чыккан. Мындан улам индиялыктар күзөтчүнү ур-токмокко алышкан. Бул кырдаалдан улам эки тарап жаңжалдашып, 30дан ашуун адам мушташа кеткен.