Прокурор "Текебаев 13-майда "Супарага" барган" деп айтып, бирок далилдеп бере алган жок

Өмүрбек Текебаев менен Дүйшөнкул Чотоновдун соттук иши Бишкек шаардык сотто уланууда. Прокурор Б.Маматбаев Текебаевдин ошол учурдагы жан сакчысына "Текебаев 2010-жылдын 13-майында "Супара" эс алуу жайына барган. Сиз ошол жерден көргөнсүзбү?" деп суроо салды. Жактоочулар прокурорго "Сиз эмнеге таянып, "Текебаевди 13-майда "Супарага" барган" деп жатасыз. Барганы чын экенин билсеңиз кайсы жерден окудуңуз? Далилдеп бериңиз" дешти.

Прокурор "иштин 2-томунун 19-барагында Текебаевдин ушундай сөзү жазылган" деп гана тим болду. Жактоочу Чынара Жакупбекова "Текебаевдин көрсөтмөсү 2-томдо жазылган эмес. Сиз иш менен жакшылап таанышпай туруп айтып жатасыз" деди.

Мындан кийин Текебаев "ошентип айтканымды иштин кагазынан окуп бер. Окуп бере албасаң сени каматам" деп ачууланды. Анын жактоочулары прокурорго ишенбөөчүлүк көрсөтүп, бирок соттук коллегия өтүнүчтү четке какты.