Бишкек шаардык сотунда Садыр Жапаров көрсөтмө берүүдө

Бүгүн, 7-сентябрда Бишкек шаардык сотунда Садыр Жапаровго карата чыгарылган өкүм боюнча апелляциялык арыз каралууда.

Соттук отурумдун жүрүшүндө жактоочу Шарабидин Токтосунов күбө катары Аскарбек Жапаров аттуу адамды суроо өтүнүчүн келтирди. Келтирилген өтүнүч боюнча прокурор каршы болду. Ал эми сот келтирилген өтүнүчтү канааттандыруусуз калтырды.

Жактоочунун камактагы Мажитовду суракка чакыруу боюнча кийинки өтүнүчү да канааттандыруусуз калтырылды.

Отурумдун жүрүшүндө Садыр Жапаров көрсөтмө берди.

"Мен "Кумтөрдү" жакшы билем. "Кумтөрдү" иштетип жаткан канадалык ишкерлерден 2003-жылы сураганыбызда алар күнүнө 150 килограмм алтын өндүрүлө турганын айтышкан. Ал эми күмүштүн эсеби жок. Кайда жумшалып жатканын да сураган эч ким жок. Кийин мен Жогорку Кеңешке депутат болгондо "Кумтөр" маселесин көтөрүп текшерүүнү сунуштагам. Андан соң тажрыйбасы мол саясатчылар менен биргеликте сот системасына реформа жасоо боюнча атайын мыйзам жазып чыктык. Ошол эле учурда "Мегаком" компаниясын 100 пайыз мамлекетке алууну айтып чыккам. Кийин дагы бир жолу "Кумтөр" маселесин көтөрүп, депутаттар мени 2012-жылы февраль айында "Кумтөрдү" изилдөөчү комиссиянын төрагасы кылып дайындашкан. Ошол учурда экологияга, экономикага келтирилген миллиарддаган зыяндарды ачыктадым. Мына ошол көтөргөн көйгөйлөрдүн аягында мага миллиондогон акчаларды ортомчулар аркылуу сунушташты. Бирок мен макул болбой койгом. Кийин өмүрүмө коркунуч келе баштаган. "Кумтөрдөгү" маалыматтарды ачыктагандан кийин эл митингге чыга баштаган. Мен бир да митингге аралашкан эмесмин. Жыйынтыгында акыйкатты айтканым үчүн камалып отурам", - деп билдирди Садыр Жапаров.