Эмне себептен сүйүктүү музыканы укканыбызда денебиз чымырайт?

Англиялык окумуштуулар көптөгөн изилдөөлөрдөн кийин гана эмне себептен биз жакшы көргөн музыканы уккан мезгилде денебиз чымырай турганын аныкташты.

Эгерде сизде дал ушундай көрүнүш болсо анда кабатыр болбоңуз, анткени мындай сезимдер бардык эле адамдарда боло бербейт.

Чет элдик басылмалар маалымдагандай, адам музыка угуп жаткан маалда мээ жана музыкадан чыккан вибрациялар өз ара эриш-аркак кызматташып мунун жыйынтыгы дененин чымырап кетүүсүнө алып келет. Адамдын мээсинде жайгашкан эмоционалдык борбор менен угуу системинин катмарынын ортосундагы тыгыз байланышка ээ болгон киши гана бул сезимдерди башынан өткөрө алат.

Жөнөкөй тил менен айтканда, мындай өзгөчөлүккө ээ адамдар бир гана сүйүктүү музыкасын укканда гана эмес, жагымдуу же кайгылуу кабар уккан мезгилде дагы денеси чымырап кетиши мүмкүн. Анткени угуу системи менен эмоционалдык борбордун ортосундагы тыгыз байланышка ээ адам сезимтал келип, уккан кабарды дароо кабыл алат.