Кыргыздын бир эмес үч көөнөрбөс мурасын камтыган "Саякбай" тасмасынын бет ачары болду

Бүгүн, 7-сентябрда "Манас" кинотеатрында "XX кылымдын Гомери" Саякбай Каралаев тууралуу тартылган "Саякбай" кинотасмасынын бет ачары болду.

Кайып дүйнөгө катарлаш, кабыландарга сапарлаш болгон улуу манасчы тууралуу тасманын бет ачарына кыргыз маданиятынын каймактары, коомдук ишмерлер жана бийлик өкүлдөрү келишти. Көрүүчүлөр бир дем менен көргөн бул тасма өзүнө бир гана айтылуу Саякбай Каралаевди жана "Манас" эпосун эмес, кыргызды бүт дүйнөгө тааныткан улуу жазуучу Чыңгыз Айтматовдун да образын камтыйт. Жазуучунун ролун уулу Эльдар Айтматов аткарган.

Тасманын режиссёру жана сценарийинин автору Эрнест Абдыжапаров: "Бул кинонун сценарийи жазылып жатканда талаш-тартыш жаралып, маселе пайда болду. Ал эми фильмди тартуу иши кандайдыр бир жогорку жактагы күчтөрдүн жардамы мененби, айтор жеңил болду", - деди.

"Бул тасма азыркы жаштарга, өсүп келе жаткан муунга эң керектүү тасма деп эсептейм. Белгилүү манасчыбыздын образынын экрандаштырылышы - кыргыз маданиятынын чоң жетишкендиги. Ар бир кыргыздын ичинде Манас атабыздын руху жашайт, ошол себептен тасмадагы ар бир актёр ролун ийине жеткире аткара алган" - деп өз пикирин манасчы Талантаалы Бакчиев билдирди.

Эскерте кетсек, "Саякбай" тасмасы Монреалда өткөн кинофестивалда "Мыкты инновациалык тасма" номинациясы боюнча "Алтын Зенит" байгесин утуп алган. Кыргыздын бир эмес, үч кереметин өзүнө камтыган тасма бүгүндөн тарта борборубуздун бардык кинотеатрларында көрсөтүлө баштады.