Бишкекте 60 жаштагы аялдын өлүмүнө шектелгендердин соту 19-сентябрга жылды

Бишкекте 60 жаштагы аялдын өлүмүнө шектелгендердин соту 19-сентябрга жылды. Бул тууралуу бүгүн, 8-сентябрда маркумдун уулу Нурлан Султанов билдирди.

Маалыматка караганда, бүгүн Бишкек шаарынын Свердлов райондук сотунда 60 жаштагы Бурмаш Акматованын өлүмүнө айыпталгандардын иши боюнча соттук отурум уланды. Анын жүрүшүндө айыпталуучулардын жактоочулары кошумча күбөнү суракка чакыруу өтүнүчүн келтиришти. Ага жабырлануучу тарап менен прокурор каршы болду. Бирок сот ал өтүнүчтү канааттандырып, ишти кароону 19-сентябрга жылдырды.

Айта кетсек, окуя ушул жылдын 22-февраль күнү түшкө чейинки убакытта Бишкектеги Тыныстанов көчөсүндө болгон. Анда 60 жаштагы Бурмаш Акматованы белгисиз кишилер өз үйүндө өлтүрүп кетишкен. Аялдын жанында бир жашар ымыркай да болгон. Сөөктү алгач мектептен келген небереси көргөн. Ал эми март айынын башында кылмышка шектүү катары 1956-жылы туулган Майрамкүл Абдурасулова жана 1953-жылы туулган Нарын Токтошев кармалган.

Алдын ала маалымат боюнча, Майрамкүл Абдурасулова маркумдун курбусу болгон. Ал окуя болгон күнү анын үйүнө мурдагы күйөөсү Нарын Токтошев менен кошо келген. Кийин Токтошев маркумду башка атып, үйдөгү 15 миң долларды алып кеткен.