"Текебаевдин сотунда калп айткан жокмун" дейт Бекназаров

Бүгүн, 8-сентябрда коомдук ишмер Азимбек Бекназаров ага карата сотто жалган көрсөтмө берди деп козголгон кылмыш иши боюнча пикирин айтты.

“Сотто чындап эле калп айтып, жалган көрсөтмө бердиңизби" деген суроо журналистерде туулуусу мүмкүн. Актоочу тарап мени сотко бар болгону кошумча күбө катары чакырышкан. Мага баш-аягы 3 суроо беришкен, баарына так жооп бердим, мен сотто калп айткан эмесмин. Керек болсо аркы дүйнөдө да дал ушундай айтканга даярмын. Менин көрсөтмөмдү эч ким жокко чыгарган жок, сотто аны эске алышкан эмес. Анда эмнеге менин көрсөтмөмө мынча көңүл буруп жатышат? Мени жоопко тартыш үчүн менин айткандарым түздөн-түз Өмүрбек Текебаевдин акталуусуна таасир этиши керек эле. Андай болгон жок да”, - деди Бекназаров.

Айта кетсек, 13-август күнү интернетке Азимбек Бекназаров менен Камчыбек Ташиевдин үнүнө окшош адамдардын Өмүрбек Текебаевдин сотундагы көрсөтмөлөр тууралуу чай үстүндө сүйлөшүүсү жазылган аудио тараган. Аты аталгандар аудионун монтаж экенин айтышкан.