ТИМ Түндүк Кореянын өзөктүк бомбаларын сыноодон өткөргөнү боюнча билдирүү таратты

Кыргыз мамлекетинин Тышкы иштер министрлиги Түндүк Кореянын 3-сентябрда бомбаларын сыноодон өткөргөнү боюнча билдирүү жасады. Бул тууралуу ТИМдин басма сөз кызматы кабарлады.

Анда БУУнун Коопсуздук Кеңешинин Түндүк Кореяга карата резолюциясында жазылган көрсөтмөлөр одоно бузулгандыгы, буга байланыштуу Кыргыз мамлекети кооптонуулар болорун билдиргени жазылат.

"Кыргыз тарап Түндүк Кореянын расмий макулдук албай туруп жасаган ушул сыяктуу кадамы Түндүк-Чыгыш Азиядагы эле эмес, дүйнө жүзүндөгү кырдаалдын курчушуна жана туруктуулуктун жоголушуна алып келет деген пикирде", - деп айтылат маалыматта.

Мындан сырткары Кыргыз Республикасы өзөктүк бомбалардын таралышын токтотуу жана жок кылууну жактаган өлкө, Борбор Азиядагы өзөктүк куралдан сырткары келишимдин активдүү мүчөсү катары Түндүк Кореяны жогорудагыдай сыноолорго каршы келишимге кошулууга чакырары белгиленген.