Кара-Суудагы шайлоо ызы-чууга карабай өттү деп табылды

Бүгүн, 9-сентябрда Борбордук шайлоо комиссиясынын отурумунда 3-сентябрдагы Кара-Суу шаардык кеңешин шайлоо боюнча маселе көтөрүлүп, 4 миң бюллетендин туура эмес чыгып калганынын себептери айтылды.

Бюллетендер "Учкун" басмаканасынан басылып чыгып, Кара-Суу шаарындагы 5 шайлоо участкасына таратылып берилгени маалымдалды. Бирок бюллетендер аппаратка батпай калгандыктан шайлоонун жүрүшүн токтотпоо максатында бюллетендер кесилип салынганы айтылды.

БШКнын мүчөсү Атыр Абдрахматова бюллетендерди кесүүгө ким буйрук бергенине кызыкты. "Бюллетень аппаратка батпай калса, аны кесип отурбай урнага салуу керек болчу. Сиздерге кескиле деп ким буйрук берди?" - деди Абдрахматова.

Кара-Суу шаарындагы №55-шайлоо участкасынын өкүлү буйрук БШК тарабынан берилгенин билдирди. БШКнын дагы бир мүчөсү Назарали Арипов бюллетендерди туура эмес чыгарган "Учкун" басмаканасынын кызматкерлерине чара көрүлүүсүн талап кылды.

Талкуунун жыйынтыгында БШК Кара-Суудагы шайлоо өттү деп тапты.

Эске сала кетсек, Кара-Суу шаардык кеңешине шайлоо 3-сентябрда өткөн. БШКнын маалыматы боюнча, Кара-Суу шаарында 6 шайлоо участогунда 9 миңден ашуун шайлоочу добуш берген. Кечээ Жогорку Кеңештин оппозициялык "Республика-Ата Журт" фракциясынын жыйынында бул маселе көтөрүлгөн.