Ташиев шайлоодо Жээнбековду колдойбу? Ташиев "жакында баарын айтам" деди

Президенттик шайлоодо Камчыбек Ташиев талапкер Сооронбай Жээнбековду колдойт деген маалымат тарады. Айрым жалпыга маалымдоо каражаттарына чыккан билдирүүлөргө таянсак, "Ата Журт" партиясы Ташиев "өлкөдө туруктуулукту сактоо, элди бөлүп-жарууга жол бербөө үчүн" бийликтин талапкери менен сүйлөшүүгө барганын ырастоодо. Бирок расмий билдирүү жасала элек.

SUPER.KG порталы 11-сентябрда Ташиевдин өзү менен байланышып "сизди шайлоодо Сооронбай Жээнбековду колдойт, аны менен биригет деген маалымат тарады. Чынбы" деген суроо узатты. Азыркы учурда Жалал-Абадда жүргөнүн айткан Ташиев: "Жакында бардык суроолорго жооп берүү үчүн маалымат жыйын өткөрөм. Жоопту ошондо айтам", - деген жооп кайтарды.

Буга чейин Камчыбек Ташиев, Ахматбек Келдибеков, Адахан Мадумаров жана Бакыт Төрөбаев биригип, президенттик шайлоого жалгыз талапкер чыгара турганын жарыялаган эле. 9-сентябрда маалымат жыйын өткөргөн Мадумаров журналисттердин суроосуна жооп берип жатып "Ташиев кандай тандоо жасаса да, анын тандоосун сыйлоо керектигин" айтты.