Акимдин орун басары: "Бабановдун баннери кайра илинди, териштирүү жүрүүдө"

Кочкор районунун акиминин орун басары Нурлан Керимкулов президенттикке талапкер Өмүрбек Бабановдун үгүт баннеринин алынышы боюнча 11-сентябрда SUPER.KG порталына комментарий берди. Жергиликтүү чиновник баннерди чечтирүүгө акимчиликтин такыр тиешеси жоктугун айтат.

"Аким эч кандай көрсөтмө берген эмес, бул айыл өкмөттүн өзүнүн иши. Биздин милдет шайлоону таза уюштуруп берүү, мындай иштерге кийлигишпейбиз. Айыл өкмөттүн башчысы менен сүйлөштүм, жарнама тактайы айыл өкмөттүн балансында экен. Эч кандай келишим түзбөстөн илип алганы үчүн кечээ баннерди алып салышкан. Кайра кечээ кечинде Бабановдун тарапташтары аны илди, азыр илинип турат. Териштирүү жүрүп жатат, анын жыйынтыгын күтөлү", - деди Керимкулов.

Аталган үгүт баннери Кочкор айыл өкмөтүнүн аймагына илинген.

Белгилей кетсек, 10-сентябрда интернетке Бабановдун сүрөтү илинген баннерди бирөөлөр чечип жатканы тартылган видеотасма тараган. Аны чечип жаткандар баннерди алып салуу боюнча акимден жана айыл өкмөттөн буйрук берилгенин айтышкан эле.

Президенттик шайлоо 15-октябрда өтөт. Үгүт кампаниясына 10-сентябрда расмий старт берилди.