Айдоочуларга 1 миллион сомго чейин айып салууну караган мыйзам сунушталды

Кыргызда жол эрежесин бузган айдоочуларга айыптын суммасын 1 миллион сомго чейин көтөрүү сунушталууда. Депутат Дастан Бекешев демилгелеген мыйзам долбоору Жогорку Кеӊештин кароосуна киргизилгени белгилүү болду. Кылмыш-жаза кодексине өзгөртүү киргизилгени жатат.

Бекешевдин айтканына таянсак, долбоорду даярдоого автокырсыктан кийин тараптардын элдешип алып, күнөөлүү айдоочулардын жазасыз калып жатканы себеп болду. Мыйзам күчүнө кирсе айдоочулардын жоопкерчилиги күчөйт деген пикирде.

Долбоордун түшүндүрмөсүндө: "Мыйзам долбоору жол кырсыктарын кыскартуу, адамдын өлүмүнө алып келген жол-кырсыктарда тараптардын элдешүүгө келүү учурларын жоюу, ошондой эле судьялар тарабынан жазык жазасын дайындоодо коррупцияны жок кылуу максатында иштелип чыкты. Адамдын өлүмү маңызы боюнча адамды этиятсыз өлтүрүү болуп саналат. Бирок айыпкер жана анын туугандары жарашуу укугун пайдаланып, өлгөн адамдын туугандарын сатып алууга келишет. Көп учурларда туугандары макул болууга мажбур, ал айыпкерди жазалануудан алып калат. Адам өлүмү кырсык болуп калып, анын натыйжасында айыпкер жаза албастан автоунаа башкарууну улантып жатат", - деп айтылат.

Жарандын ден соолугуна өтө оор эмес зыян келтирген айдоочуга 100 миӊ сом айып салуу же 3 жылга чейин эркинен ажыратуу нормасы каралып жатат. Ал эми адам өлүмүнө жеткирген автокырсыкка күнөөлүү айдоочуну 5-7 жылга эркинен ажыратуу же 3 жылга унаа башкаруу укугун алып коюу чарасы сунушталат. Тийиштүү документи жок жана мас абалында унаа айдап, бир же бир нече адамдын өлүмүнө күнөөлүү болгон айдоочуга 1 миллион сом айып салуу, буга кошумча 5 жылга эркинен ажыратуу жазасы сунушталып жатат.