"Кыргыз жеринде жыл сайын 17 миллион көчөт отургузулат" дейт башкы токойчу

2017-жылдын башынан бери өлкөдө токойдогу бактарды кыюу боюнча 249 мыйзам бузуу катталган. Бул тууралуу бүгүн, 12-сентябрда өткөн Кыргыз өлкөсүнүн токой чарбасынын 70 жылдыгына арналган маалымат жыйынында Токой экосистемдерин өнүктүрүү департаментинин директору Элдияр Шерипов билдирди.

"Кыргыз өлкөсүнүн аймагынын 5,6 пайызын гана токой ээлейт. Жыл сайын 1000 гектар жерге 17 миллион ар түрдүү көчөттөр отургузулат", - деди ал.

Ал эми Айлана-чөйрөнү коргоо жана токой чарба мамлекеттик агенттигинин директору Абдыкалык Рустамов келерки жылдын жаз айларында элдин катышуусу менен бир күндө 1 миллион көчөт отургузуу иш-чарасын уюштуруу пландалып жатканын билдирди.

Анын айтымында, өлкөдө токой чарбасы тармагында эмгектенген кызматкерлер 6 миңден 10 миң сомго чейин айлык алышат. Алардын арасында 40 жылдан бери иштеген адамдар дагы бар.