Кубанычбек Кулматов Улуттук банктын төрагалык кызматына келсе кадрларды алмаштырбай турганын айтты

Кубанычбек Кулматов Улуттук банктын төрагалык кызматына келсе кадрларды алмаштырбай турганын айтты. Бул тууралуу ал бүгүн, 12-сентябрда парламенттин тийиштүү комитетинин жыйынында депутат Нурланбек Макеевдин суроосуна жооп берип жатып билдирди.

Макеев Кулматовдон кадр саясаты кандай боло турганын сурады. "Сиз келсеңиз орун басарларыңыз, бөлүмдүн башчылары алмашып калышы мүмкүн. Алмаштырып чыгасызбы же ошол бойдон калабы?" - деп суроо узатты.

"Улуттук банктын бүгүнкү күндөгү кадрлар жакшы иш алып барып жатат. Сыноо мөөнөтү 6 айга чейин болот экен. Жакшы иштеп жатышса мен эмнеге алмаштырмак элем?" - деп жооп берди.

Депутат президент Алмазбек Атамбаев тарабынан көрсөтүлүп жаткандыктан "аванс" катары колдой турганын айтты.

Жыйынтыгында Экономикалык жана фискалдык саясат боюнча комитеттин депутаттары Улуттук банктын төрагалыгына көрсөтүлүп жаткан Кубанычбек Кулматовдун талапкерлигин жактырышты.