Текебаев менен Чотоновдун иши боюнча соттук отурум 14-сентябрга жылдырылды

Бүгүн, 12-сентябрда Бишкек шаардык сотунда "Ата Мекен" партиясынын лидери Өмүрбек Текебаев менен экс-министр Дүйшөнкул Чотоновдун кылмыш иши боюнча сот отуруму уланды. Алгач күбө катары Убактылуу өкмөттүн мүчөлөрү болгон Кеңешбек Дүйшөбаев, Азимбек Бекназаров, Болот Шер жана 2010-жылдын 13-майында Текебаев менен жолугушкан айылдашы көрсөтмө берди. Күбө катары Эсептөө палатасынын мурдагы төрайымы Элмира Ибраимова да чакырылган. Бирок ал келе алган жок. Күндүн экинчи жарымынан тартып соттук коллегия иштин материалдарын иликтөөгө киришип, бирок жумуш убактысы бүтүп калгандыгына байланыштуу ишти 14-сентябрда улантуу чечимине келди.

Эскерте кетсек, 16-августта Биринчи Май райондук сотунун судьясы Айбек Эрнис уулу соттолуучуларды 8 жылга эркинен ажыратып, мүлкүн мамлекетке чегерүү жана бошотулгандан кийин үч жыл мамлекеттик кызматта иштебөө тууралуу чечим кабыл алган. Бирок Башкы прокуратура райондук соттун чечимине макул болбой, соттолуучулардын абакта өтөөчү жаза мөөнөтүн узартып берүүсүн сурап, Бишкек шаардык сотко апелляциялык арыз менен кайрылган.