Жолборсторду коргоо үчүн модель Лондонду жылаңач кыдырды

Америкалык модель, актриса жана жаныбарларды коргоо боюнча активист Жоанна Крупа жолборсторду коргоо үчүн жылаңачтанды. Чет элдик басылмалар кабарлагандай, мындай өзгөчө акцияны РЕТА экологиялык компаниясы жана анын активдүү мүчөсү Жоанна Крупа Британиянын парламентинин алдында өткөрүшкөн.

Акцияда 38 жаштагы моделде болгону шиш такалуу бут кийим жана ич кийими болгон. Жоаннанын моюнунан баштап бутуна чейин жолборстун элесин берген сүрөт тартылган. Мындай кадамы менен модель коомчулуктун көңүлүн циркте кордукка кабылган жолборсторго бургусу келген.

Модель Лондондун борборунда "Жапайы жаныбарларды циркте пайдаланууга тыюу салгыла!" деген жазууну кармап алып, миңдеген адамдардын алдында баскан.

Өз сөзүндө Жоанна Англияда азыркы учурга чейин цирк өнүгүп, жаныбарларды кыйноо уланып жатканын билдирген: "Мен Британияны жапайы жаныбарларды коргогондугу үчүн сыйлап келгем. Бирок азыркы учурда ал жакта жапайы жаныбарлар циркте кыйноолорго кабылып жатканын угуп таң калдым. Бир дагы жаныбарды адамдардын көңүлүн ачуу үчүн кайсы бир трюктарды аткарууга мажбурлоого эч кимдин акысы жок. Британ бийлиги бул көрүнүшкө чекит коюшу керек", - деп билдирген.

Жоанна беш жашынан баштап Лос-Анжелесте жашайт. Ал 15 жашынан тартып моделдик карьерасын баштаган. "Playboy", "FHM", "Maxim" жана башка белгилүү журналдар үчүн сүрөткө тартылган. "Maxim" журналынын окурмандарынын ою боюнча дүйнө жүзүндөгү эң сулуу 100 айымдын катарына кирген.